Sosue 4

-Ta 'blʋa -wee' -kwɛa Sudɛn -gbuu cɛan' 'sʋ Nyɔsoa wluɛ Sosue' -pee ɛ 'na: 2 Ao "duo nyɩɔ 'ɔ -puue 'jɔ 'sɔɔn 'ʋn 'de aopʋ "kwlu, due' 'wlʋ 'de 'blʋa 'a 'blowɔn 'di, 3 -wɛe ao 'tmʋʋ- ʋʋpʋ ʋʋ 'je "sou 'a -pue 'jɔ 'sɔɔn 'ʋn "duo 'de -ta 'sraa -saʋn nynai 'de Sudɛn -gbuu wɔn ɛ, 'de ʋʋ 'jɩ 'de -ta aoa mua 'pɛan "maʋ -sɩan kpa.

4 Sosue' 'da nyʋ 'a -puue 'jɔ 'sɔɔn ʋʋ -sa 'de Israɛ -nyʋ 'a 'blʋa 'a 'blowɔn 'dii due due' 'mɛ, 5 -wɛe Sosue' 'da ka 'de ʋʋpʋ -pee: Ao -si' 'de Nyɔsoa aoa' Kea 'a dbɛɛdɛ 'ɛ -gbau' "juɛi -wɛe ao 'je 'de Sudɛn -gbuu 'a -kwea' mu. Nyɔ due' "duo "sou kpo due' 'ʋn 'mʋa- ɔ 'je 'de ɔɔ' kpoa" wli "kpei -te', -bo ɛ nɩ 'kan a -wɛe Israɛ -nyʋ 'a 'blʋa 'a 'blowɔn due' 'je "sou kpo due' 'ble. 6 Ɩa' "soi tu 'e "jriɛ o sie dɛ nɩ 'de aopʋ "kwlu. -Bo 'de nya, 'de aoa' "nynuu 'je aopʋ i -tee ʋʋ 'je nʋ dɛ "soi -nɩ -sa wɔ 'de aopʋ 'a -tɩ' 'ʋn -ɛ, 7 aoa muɛ "kpei -saa' 'de ʋʋpʋ -pee ka: -Ta Nyɔsoa 'a dbɛɛdɛ 'ɛ -gbau' a cɛan Sudɛn -gbuu ɛ, "ni cɛn "i 'de ɛ "juɛi. "Soi -nɩ mɩ -nɩ dɩ -nʋa 'de Sudɛn -gbuu wɔn -wɛe "ni ma 'a -tɩ' -kwlʋ o po dɛ. 8 Israɛ -nyʋ nʋɛ ka Sosue' "sia 'nynɩ: Ʋʋ "duɛ "soi kpi 'a -puue 'jɔ 'sɔɔn 'ʋn 'de Sudɛn -gbuu 'a -kwea', Israɛ -nyʋ 'a 'blʋa 'a 'blowɔn due' 'bleɛ "sou kpo due', ka Nyɔsoa "sia ɛɛ' 'nynɩ 'de Sosue' -pee ɛ, ʋʋ kpɩ 'de ʋʋa -kwlena' -wɛe ʋʋ -te' ɩ i 'demu. 9 Sosue' poɛ "soi kpi 'a -puue jɔ 'sɔɔn -kwlu -ke 'de Sudɛn -gbuu 'a -kwea'- -ta 'sraa -saʋn -blea dbɛɛdɛ 'ɛ -gbau' nyna i ɛ. Ɩ nɩ 'e 'wɛ -sɩan ke.

10 'Sraa -saʋn -blea dbɛɛdɛ 'ɛ -gbau' nynai 'de Sudɛn -gbuu 'a -kwea' mamaʋ 'sʋ 'dɩ Nyɔsoa "sia 'nynɩ 'de Sosue' -pee ʋʋ jɩ -wee' nʋ. Ka ɔ "sia ɛɛ' 'nynɩ "kpɩ 'kamɔ Sosue' nʋ dɩ -wee' "klein Moisɩ 'tmʋa 'de ɔ -pee ɛ. Craa- 'sʋ ʋʋ cɛn "ni 'mɛ. 11 -Ta nyʋ -wee' "klein -kɔa' -sia' ʋʋ nynia 'de 'kpʋʋ -sia 'emu "kpei 'sʋ ɛ, Nyɔsoa 'a dbɛɛdɛ 'ɛ -gbau' 'sraa -saʋn 'blea -siɛ' 'de 'blʋa -wee' 'a nya. 12 Nyʋ -wlʋa 'de Rubɛnɩ ke Gadɩ 'a 'blʋa 'a 'blowɔn 'di ɛ ke Manase 'a 'blʋa 'a 'blowɔn 'ɔ tɔo "duɛ tʋ -fʋn -dɩ 'ʋn -wɛe ʋʋ -si' 'de Israɛ -nyʋ 'a nya, ka Moisɩ "sia ɛɛ' 'nynɩ 'de ʋʋpʋ -pee ɛ. 13 Dɛ -bɛa' "sooa 'a -kwlʋ -nyiiɛ' mʋ -ʋʋ -duo" tʋ -fʋn -dɩ 'ʋn -ʋʋ -te kein" ke 'de Nyɔsoa "juɛi -wɛe -ʋʋ -to "jru 'de Seriko 'a wlao 'di. 14 Ɛɛ' 'wɩ tu o ɛ, Nyɔsoa 'bɛɛ Sosue' "i 'de Israɛ -nyʋ -wee' "klein "juɛi -wɛe ʋʋa -te' ɔɔ' ni' 'de ɔɔ' 'kmʋ nɩa' -wee' 'ʋn ka ʋʋ -tea' Moisɩ 'a ni' ɛ.

15 'De -mɛ 'de Nyɔsoa wluɛ Sosue' -pee ɛ 'na: 16 -Tmʋʋ' 'sraa -saʋn -blea dbɛɛdɛ 'ɛ -gbau' -ɛ 'di dbɛɛdɛ -crɩa' 'de "soi pae' "kpei nɩa, ʋʋ 'je 'de Sudɛn wɔn 'wlʋ. 17 Sosue' 'tmʋʋ 'sraa -saʋn 'mɛ ɔ 'na: Ao 'wlʋ 'de Sudɛn -gbuu wɔn.

18 'Sraa -saʋn -blea Nyɔsoa 'a dbɛɛdɛ 'ɛ -gbau' 'wlʋa 'de "ni -gbuu wɔn ʋʋ -tea' bʋ 'de 'kpʋʋ "kpei "kpɩ, 'sʋ Sudɛn -gbuu -teɛ -sia' -pʋn" ka ɛɛ -sia see ɛ. 19 Israɛ -nyʋ cɛn Sudɛn -gbuu 'mɛ "i -saa -cʋ 'a 'wɩ 'sɔɔn -nɩ "kpei. Ʋʋ -kwle' 'de Kilgalɩ 'de Seriko 'a -paʋn -nɩa 'de 'jrʋ 'a blʋ 'ɩn fɔo. 20 'De Kilgalɩ 'de Sosue' poo "soi 'a -puue 'jɔ 'sɔɔn ʋʋ sa 'de Sudɛn -gbuu wɔn -kwlu'. 21 -Wɛe ɔ wlu ka 'de Israɛ -nyʋ -pee: -Bo 'de nya 'a nya, aoa' "nynuu -tee ʋʋpʋ 'a "bo -wi" i 'de ʋʋ 'na dɛ "soi -nɩ -sa wɔ -ɛ, 22 aoa muɛ ka Israɛ -nyʋ cɛan Sudɛn -gbuu 'blʋɔ wɔ -saa' 'de ʋʋpʋ -pee. 23 Dɛ-nʋɛ' ɛmɛ -nɩ Nyɔsoa aoa' Kea maa Sudɛn -gbuu 'mɛ 'de ao "juɛi mamaʋ 'sʋ ao jeɛ cɛn, ka ɛ maa 'tɔniɛ -saan 'de -a -juɛi" -wɛe -a cɩɛn 'de ɛ. 24 Ɛɛ nʋɛ 'kan -wɛe 'blʋɩ "klein -nɩa nɔ' 'kmʋ "kpei 'jeɛ juo ka Nyɔsoa 'a -cɛ" 'ɛ sʋn 'a "i kmaa' 'bɛa "i ɛ. -Wɛe ao mɔ 'ɔ -cɛ" 'je Nyɔsoa aoa' Kea plee nɔ" "o nɔ" -wee' 'di.